Menu

Paasissutissat nalinginnaasut

Efterskolet tassaapput inuusuttunut 14-iniit 18-inik ukiulinnut atuarfiit nerisaqarfiullutillu ineqarfiusut. Taakkunani 8., 9. 10. klassimilu ilinniartakkat ilinniartitsissutigineqartarput. Meeqqat atuarfiat naammassereeraanni 10. kl orniginarneruvoq, qinigassat amerlanerugamik

Kikkut aqqutigalugit nassiussaanersut malillugit efterskolertut imak immikkoortinneqartarput:

  • Angajoqqaaminnit nammineq akiliullugillu isumagineqartut
  • Efterskoleadministration aqqutigalugu efterskolertut, kalaallit illuutaanillu isumagineqarlutillu aqqutissiorneqartartut
  • Kommuunit aqqutigalugit efterskolertut

Odensemi Kalaallit Illutaat Region Syddanmarkimi, nunatsinni Efterskolertunik Aqutsisoqarfik qanimut suleqatigalugu, nunatsinnit efterskolertunut pisortatigoortumik aqutsisuullunilu aqqutissiuisuuvoq.

Efterskolertoq

Efterskolissagaanni iluarnerpaavoq efterskolertussap inerisimanissaa akisussaaffimmillu tigusisinnaanissaa. Soorlu:

  • atuarfimmi malittarisassat malittariaqarput
  • inuppassuarnik nutaanik naapitsinissaminut piareersimasariaqarpoq
  • nipituumiissinnaasariaqarpoq
  • qallunaatut oqalukkusussinnaasariaqarpoq

Misilittakkatta takutippaat, efterskolertut ukiukinnerit inerisimannginnerusullu unitsitsiinnarnerusartut.

Efterskolemik toqqaaneq

Efterskolemik toqqaaniarnermi, misissugassaassaaq efterskoleq aalajangersimasumik sammisaqartitsisartuunersoq. Soorlu:

  • Atuagarsorneq
  • Nipilersorneq
  • Timersorneq
  • Upperisarsiorneq
  • Allanik immikkut ittunik pisariaqartitsisunik pikkoriffeqarnersut

Maanngaanniit siunnersuutigissavarput efterskoleq angivallaanngitsoq toqqarneqassasoq. Taamaasilluni efterskolip meeqqat ataasiakkaat piffissaqarfiginerullugillu pisariaqartitaat malillugit sullilluarsinnaanerussavaat.

Danmarkimi efterskolet pillugit suli misissuerusukkuit nittartagaq efterskole.dk alakkarsinnaavat (qallunaatuujuvoq).

Qinnuteqarneq

Tapisinissamut uku tunngaviusumik piumasaqaataapput:

  • Efterskolertussap angajoqqaavilu ullup efterskolerfiusup aallartinnera sioqqullugu ukioq ataaseq nunatsinni najugaqarsimasariaqarput
  • Efterskolertussaq ukiuni 8-ni atuareersimassaaq 14-17-inik ukioqassalluni
  • Efterskolertussaq Atuartitaanermi Ministeriaqarfimmit akuerisamik efterskolemi akueritereersimassaaq
  • Efterskolertussaq ilaqutariinnik attaveqaateqassammat (kontaktfamilie)
  • Qinnuteqaammut ilanngunneqassapput:
    • Kuisinnermut allagartaq,
    • efterskolertup najugaqarfigisimasaasa allattorsimaffiat (historisk bopælsattest)
    • ilaqutariillu najugaqatigiinnerannut uppernarsaat (bopælsattest for husstanden)

Nunatsinnit tapisiaqarnissamut qinnuteqarneq killeqanngilaq, taamaallaat Efterskolertunik Aqutsisoqarfiup angalanissaq isumagissappagu qinnuteqarnissamut marsip 15-iat killigitinneqarpoq.

* Meeqqat angerlarsimaffiup avataani inissinneqarnikut aamma innarluutilittut nalunaarsornikut (vidtgående handicap) efterskolenut qinnuteqarniarunik meeqqap kommunerisaani sullissisuatigoortariaqassaaq.

Tapiissutigineqarsinnaasut

Ukununnga tapertinnissamut qinnuteqarsinnaavusi:

  • Angajoqqaat atuarfimmut akiliutaanik annikillisaaneq
  • Efterskolertussap atuariartoqqaarnera naammassinermilu angerlarnera
  • Efterskolertup ilaqutaani qaninnerpaani napparsimaruloortoqarnerani imal. ilisiartornermilu angalanerit
  • Angojoqqaat efterskolertup napparsimaruloornerani imal. toqunerani angalaneri

Uani qinnuteqarsinnaavutit

Malugiuk: Juullip nalaani (juleferie) angalaneq taperneqarneq ajorpoq.

Angajoqqaarsiat

Tapisinissamut piumasaqaataavoq, efterskolertup pinngitsoornani efterskolertoq angajoqqaarsiaqarnissaa.

Angajoqqaarsiat toqqartinnagit eqqarsaatigineqartariaqarpoq efterskolemiit ungasippallaannginnissaat. Ungasippallaarpata efterskolemi akuusarnissaat killeqalissammat, aammalu efterskolertup taakkununnga angalasarnera akisullunilu sivisussammat. Tassami angalaneq Naalakkersuisunit akiliunneqarneq ajormat angajoqqaat namminneq akilertartussaassavaat.

Nammineq nassaarsinnaanngikkaanni

Uagut angajoqqaarsianinnersuineq ajorpugut, kisianni Kalaallit illuutaani allagarsiivimmut allagarsiissutiliarsi nivinngarsinnaavarput.

Aamma efterskolimiittut toqqarlugit ikiusinnaanersut aperisinnaavasi, kisianni nalussanngilarsi angajoqqaarsianik ikiuinissaminnik pisussaatitaanngimmata.

Angajoqqaarsianut piumasaqaatit ilaqutariit attaveqaatinngorniarnermut qinnuteqaatip quppernerata aappaani atuarsinnaassavarsi.

Taarsiiniaraanni

Efterskolertoq nutaanik angajoqqaasianik, immersugassaq nutaaq Kallaalit Illuutaanut nassiunneqassaaq.

Aallannginnermi

Aallannginnermi angajoqqaat efterskolertussap nassatassaanik isumagisassaat:

  • Passeq NemID-lu
  • Atuarfiup efterskolertumut nassataritikkusutai (ilaanni Danmarkimi pisiaralugit, Nunatsinnit nassiunneraninngaanniit akikinnerusarpoq)
  • Efterskolemut ilaqutariit attaveqaatinullu pisinnaatitsissut. Taamaasilluni efterskoli ilaqutariit attaveqaataalluunniit efterskolertumut blå sygsikringskortimik (nunanut allanut angalatilluni napparsimaleraanni ikiorneqarnissamut qularnaveeqqussummik) qinnuteqaassisinnaanngussapput.

Meeqqat angalanermini sillimmasernissaa angajoqqaat namminneq isumagisassaraat.

Efterskolertussap nassatassai tamarmik timmisartukkut nassarsinnaanngippata, sinneri umiarsuakkut efterskolimut imal. ilaqutariit attaveqaatinut nassiunneqarsinnaapput. Uani angajoqqaat nassiussineq imal. oqimaappallaanik nassataqarnermi akiliutit namminneq akisussaaffigaat. Qanoq nassataqartigeqqusaaneq timmisartortitsiviup nittartagaani atuarneqarsinnaavoq. Soorlu Air Greenlandip nassatanut piumasaqaatai uani atuarneqarsinnaapput. 

Aamma eqqaamassavarsi pingaarluinnarmat ukiorsiutit nassartinnissaat.

Tikinneq

Nalinginnaasumik efterskolertussaq Danmarkimut tikikkuni ilaqutariit attaveqaataasa aassavaat, atuariartulerpallu atuarfimmukaallugu.  

 

Danmarkimi angalaneq

Efterskolertoq qimuttuitsussappat "Ungdomsbilletter" pisiarineqarsinnaapput. Uani piumasaqaataaginnarpoq sygesikringskort (sungaartoq) takutinneqarsinnaanissaa.

Aamma Rejsekort-isisoqarsinnaavoq. Rejsekort angallatinut ilaasartaatsinut tamanut (bussit, qimuttuitsut, Københavnimi qimuttuitsut, metromi) atorneqarsinnaapput. Tassa akiliutitut nalinginnaasutut atorneqarsinnaavoq - taamaallaat angalanermut atatillugu. Paasissutissat qallunaatuut uani takusinnaassavatit.

Allu Weekend

Foreningen Grønlandske Børn weekend-tertittisarpoq kalaallit nunaanniit efterskolertunut. Uani atuarsinnaavat neqeroorut qanorlu atuartoq allatsinneqarsinnaanersoq: https://fgb.dk/allu/

Ilinniagaqalernissamut siunnersuineq

Ilinniagaqalernissamut qinnuteqarfissaq marsip aallaqqaataa tikitsinnagu efterskolertunut taakkulu atuarfimmi attaveqaataannut ilinniagaqalernissamut paasititsiniaasarpugut.

Ilinniarnermut paasisaqarnerorusukkuit sullissivik.gl alakkaruk.

Nunatsinnit misilitsinnerit

Kalaallit Danmarkimi efterskolertut nunatsinnit kalaallisut allattariarsornermut misilitsikkusunnerlutik toqqarsinnaanngornikuuaat - ilinniarfigerusutap piumasaqaatai apeqqutaatillugit. Taanna Uddannelsestyrelsep atuarfiullu toqqaannarlugu isumaqatigissavaat

 

  • Kalaallisut
  • Qallunaatut
  • Tuluttut
  • Matematikki

Qinnuteqarneq atuarfiup isumagissavaa, kisianni ilissi angajoqqaat efterskolertuutersilu atsiortussaassaasi aamma.

Angerlarneq

Kalaallit efterskolertut angerlarnissaat imatut pilersaarneqartarpoq:

  1. Januaarip ingerlanerani angerlarniarnermut qinnuteqaat efterskolertup angajoqqaavinut nassiuttarpavut.
  2. Angajoqqaat atuarfik ilaqutariit attaveqaataallu qanimut suleqatigalugit immersoriarlugit uagutsinnut nassiuttarpaat.
  3. Uagut qinnuteqaat akuereriarlugu Grønlands Rejsebureauimut ingerlateqqittarparput.
  4. Angalatitsiviup, angalanissaq isumageriarlugu, qinnuteqaammi emailimut allassimasumut uagutsinnullu nassiuttarpaat.

Nassatat oqimaappallaarneranut akiuliutit angajoqqaat namminneq akiligassaraat. Qanoq nassataqartigeqqusaaneq timmisartortitsiviup nittartagaani atuarneqarsinnaavoq. Soorlu Air Greenlandip nassatanut piumasaqaatai uani atuarneqarsinnaapput.

Angerlarnissamut qinnuteqaat aana qinnuteqaasiornermullu ilitsersuut aana

Poortukkat nassuinneri

Efterskolertussap nassatassai tamarmik timmisartukkut nassarsinnaanngippata, sinneri umiarsuakkut angerlamut nassiunneqarsinnaapput. Uani angajoqqaat nassiussineq namminneq akiligassaraat.

Atugarliorneq

Atuartoq arlaatigut atugarliorpat piaartumik Kalaallit Illuutaat attavigineqassaaq. Taamaasilluni atuartoq, atuarfik, ilaqutariit attaveqaataallu qanimut suleqatigalugit ajornartorsuit aaqqinniarsinnaaniassavarput.

Unitsitsiinnarneq

Maanaannaq efterskolertoq atuarunnaarluni angerlassappat, angerlarnissaa Efterskolertunik Aqutsisoqarfimmit akilerneqassappat, piumasaqaataavoq angerlarnissaq sioqqullugu atuartup oqaloqatigereersimassagaatigut.

Efterskolimut allamut nuunneq

Efterskolimut allamut nuunniarneq angajoqqaat namminneq isumagisassaraat. Angajoqqaalli eqqumaffigissavaat nuunnermi akitsuuteqarsinnaasarmat, angajoqqaat namminneq akiligassaannik:

  • Efterskolimi qimalikkami akitsuut (aki aalajangersimasoq imal. sap. ak. 4-nut efterskolernermut akiliut - Danmarkimi naalakkersuisunit taperneqanngitsoq)
  • Efterskolerfittaassami allatsinnermi akitsuut qularnerveeqqullu

Efterskolertoq efterskolimut allamut nuunniarpat, immersugassaq "Efterskoleskift" immersoriarlugu uagutsinnut nunatsinniluunniit Efterskolinik Aqutsisoqarfimmut nassiunneqassaaq.

Ilaqutariit iluanni peruluttorqarpat toqusoqarpalluunniit

Efterskolertup qanigisaani (qatanngutit, aappat, meeqqat, angajoqqaat, aanaakkut, allallu qanigisatut isigineqarsinnaasut) peruluttoqarpat imal. toqusoqarpat, efterskolertup tassunga angalanera akilerneqarsinnaavoq. Taamaattoqassappat, angajoqqaat attaveqarfigissavaagut uppernarsaatinillu nassilluta. Taava uagut angalanissaa isumagisinnaassavarput.

Isiginnaagassiaq

Kortfilm på grønlandsk om, at være en grønlandsk efterskoleelev i Danmark (Efterskoleforeningen)/Efterskolerneq pillugu kalaallisut isiginnaagassiaq uani takusinnaavat.

Webportal med undervisningsmateriale om Grønland (Det Grønlandske Hus i København)

Udsendelser om Grønland (DR.dk)

 

Paasisaqarnerorusukkuit

  • Mette Lund

    Ilinniarnermut aqqutissiuisoq

    +45 25 60 76 46

  • Marianne Jensen

    Ilinniarnermut aqqutissiuisoq

    +45 22 42 08 13