Inissarsiorneq

Ilinniarnissamut inissarsiorneq nammineq akisussaaffigaat. Piaartumik inissarsiorneq pingaaruteqarpoq, Danmarkimut tikinninni inissaqanngitsuunnginnerussagavit. Ingammik pingaaruteqarpoq ilaquttatit (aappat meeqqalluunniit) ilagalugit nuunniaruit, taakkua bilitsissaata pequtinilluunniit nuussinerup akia aatsaat inissiamik nassaareersimasuuguit akiliunneqarsinnaammata.

Ilinniarfissamut qinnuteqareeruit piaartumik illoqarfinni qinnuteqarfigisimasannut inissarsiussaatit. Eqqaamassavat inissianut atorfissaqartinngisannut qinnuteqaatit taamaatiinnassagakkit.

Eqqaamassavattaaq aallaqqaatissatut akiliutit qaammatillu ataatsip inissiami najugaqarnerup nalinga akilissagakkit. Aningaasaqarneq pillugu paasisaqarnerusinnaavutit ugguuna.

Qanoq?

Inuusuttut inissiaataannik makkua aqqutigalugit qinnuteqarsinnaavutit:

• Ungdomsboliger.dk (ungdomsboliger) aammalu studiebolig-odense.dk
• Danmarkbolig.dk imaluunniit boligøen.dk (inissiat tamanoortut)
• Privatimik attartortitsisut. Privatimik attartortitsisartut aqqutigalugit inissiamik qinnuteqarniaruit eqqaamajuassuat peqqusersusaartissannginnavit. Peqqusersusaarineq pillugu ugguuna paasisaqarnerusinnaavutit
• Inuussutissarsiornermik ilinniarfimmi ilinniassamaaruit taakkua skolehjemiitigut qinnuteqassamaaruit.

"Tag over hovedet-garanti" Odense-mi

Studiebolig-odense.dk aqqutigalugu inissiamik qinnuteqarniaruit "Tag over hovedet-garanti" atorlugu qinnuteqarsinnaavutit piumasaqaatit eqqorukkit. Piumasaqaatit eqqorukkit utaqqisaannaagallartumik inissiartaarsinnaavutit kommuneqarfik aqqutigalugu. Piumasaqaatit pillugit paasisaqarnerusinnaavutit ugguuna.

Aningaasaliissutinik taarsigassarsioneq inissiamullu tapiissut

Aningaasaliissutinik taarsigassarsiorsinnaavutit kommuneqarfimmi. Malittarisassat qinnuteqaallu pillugit ugguuna paasisaqarnerusinnaavutit.

Malugiuk: Aningaasaliissutinik taarsigassarsiorsinnaanngilatit inissiamik attartuinissamut isumaqatigiissummik atsioreersimaguit.

Inissiamut tapiissummik qinnuteqarsinnaavutit. Malittarisassat qinnuteqaallu pillugit ugguuna paasisaqarnerusunnaavutit (qallunaatut taamaallaat atuarneqarsinnaavoq).

Malugiuk:

• Inissiaq pequtinik aaqqissuunneqareerpa? Inuusuttunut inissiat akulikitsumik pequtinik aaqqissuunneqareertanngillat.
• Aningaasaliissutit akiliutillu nalingi suuppat?
• Erngup kiassarnerlu nalingi aningaasaliissummi ilaappat?
• Inissiaq arlaatigut tapersersorneqarsinnaava? Nammineq igaffeqaraanni nalingiinnaasumik tapersersorneqarsinnaasarpoq.
• m2-t fællesarealenut ilaasarmata

Nordatlantisk Husimi inuusuttunut inissiat

Kalaallit Illuutaat Odense inissianik attartortitsisarpoq. Inissiat tamarmik Nordatlantisk Husimut atapput. Venteliste-mut ilanngunneqaruit malugissuat inissiamik attartornissamut neqeroorut ataasiaannarlutit naaggaarsinnaagakku utaqqisut listianniiginnarniaruit.

Inuusuttunut inissiat perusuersartarfeqarlutik uffarfeqarlutillu igaffeeraqarput. Attartuisut igaffissuarmik errorsisarfimmillu aamma atuisinnaatitaapput. Inuusuttunut inissiat tamarmik kiilerimi toqqorsiveqarput.

Katillugit inuusuttunut inissiat 25-iupput. Inissiat tamarmik Kristiansdals Boligforeningimit pigineqarlutillu isumagineqartarput. 

Inissiat Odense-p umiarsualiviata qeqqani inissisimapput:

• Qimutsuitsoqarfimmut 15 minutsit iluanni pisussinnaavutit
• University College Lillebælt (UCL)-imut) 10 minutsit iluanni pisussinnaavutit
• Odense-p illoqarfiata qeqqanut 20 minutsit iluanni pisussinnaavutit

Nordatlantiske Ungdomsboliger ugguuna paasisaqarfiginerukkit qinnuteqaalluunniit ugguuna pissarsiariuk.