Paasissutissat nalinginnaasut
Efterskolet tassaapput inuusuttunut 14-iniit 18-inik ukiulinnut kostskolet (atuarfiit nerisaqarfiullutillu ineqarfiusut). Taakkunani 8., 9. 10. klassimilu ilinniartakkat ilinniartitsissutigineqartarput.
Kikkut aqqutigalugit nassiussaanersut malillugit efterskolertut imak immikkoortinneqartarput:
- Angajoqqaaminnit nammineq akiliullugillu isumagineqartut
- Uddannelsesstyrelsen (Oqaatsinik Pikkorissarfimmiinnikut) aqqutigalugit efterskolertut, kalaallit illuuinillu isumagineqarlutillu aqqutissiorneqartartut
- Kommuunit aqqutigalugit efterskolertut
Odensemi Kalaallit Illutaat Danmarkip kujataani (Region Syddanmarkimi), nunatsinni Efterskolertunik Aqutsisoqarfik qanimut suleqatigalugu, nunatsinnit efterskolertunut pisortatigoortumik aqutsisuullunilu aqqutissiuisuuvoq.
Efterskolertoq
Efterskolissagaanni iluarnerpaavoq efterskolertussap inerisimanissaa akisussaaffimmillu tigusisinnaanissaa. Soorlu efterskolertoq nammineq ullaakkut makissinnaasariaqarpoq, errorsisinnaassariaqarpoq, inunnik nutaanik naapitsinissaminut piareersimasariaqarpoq, taavalu qallunaatut oqalunnissamut ammasariaqarluni.
Misilittakkatta takutippaat, efterskolertut ukiukinnerit inerisimannginnerusullu unitsitsiinnarnerusartut.
Efterskolemik toqqaaneq
Efterskolemik toqqaaniarnermi, misissugassaassaaq efterskoleq upperisarsiortuunersoq imaluunniit aalajangersimasumik sammisaqartuunersoq.
Maanngaanniit siunnersuutigissavarput efterskoleq angivallaanngitsoq toqqarneqassasoq. Taamaasilluni efterskolip meeqqat ataasiakkaat piffissaqarfiginerullugillu pisariaqartitaat malillugit sullilluarsinnaanerussavaat.
Danmarkimi efterskolet pillugit suli misissuerusukkuit nittartagaq efterskole.dk alakkarsinnaavat (qallunaatuujuvoq).
Qinnuteqarneq
Tapisinissamut uku tunngaviusumik piumasaqaataapput:
- Efterskolertussap angajoqqaavilu ullup efterskolerfiusup aallartinnera sioqqullugu ukioq ataaseq nunatsinni najugaqarsimasariaqarput
- Efterskolertussaq ukiuni 8-ni atuareersimassaaq 14-17-inik ukioqassalluni
- Efterskolertussaq Atuartitaanermi Ministeriaqarfimmit akuerisamik efterskolemi akueritereersimassaaq
- Efterskolertussaq angajoqqaarsiassaqassaaq
- Qinnuteqaammut ilanngunneqassapput:
- Kuisinnermut allagartaq,
- efterskolertup najugaqarfigisimasaasa allattorsimaffiat (historisk bopælsattest)
- ilaqutariillu najugaqatigiinnerannut uppernarsaat (bopælsattest for husstanden)
Nunatsinnit tapisiaqarnissamut qinnuteqarneq killeqanngilaq, taamaallaat Efterskolertunik Aqutsisoqarfiup angalanissaq isumagissappagu qinnuteqarnissamut marsip 15-iat killigitinneqarpoq.
* Meeqqat angerlarsimaffiup avataani inissinneqarnikut aamma innarluutilittut nalunaarsornikut (vidtgående handicap) efterskolenut qinnuteqarniarunik meeqqap kommunerisaani sullissisuatigoortariaqassaaq.
Tapiissutigineqarsinnaasut
Ukununnga tapertinnissamut qinnuteqarsinnaavusi:
- Angajoqqaat atuarfimmut akiliutaanik annikillisaaneq
- Efterskolertussap atuariartoqqaarnera naammassinermilu angerlarnera
- Efterskolertup ilaqutaani qaninnerpaani napparsimaruloortoqarnerani imal. ilisiartornermilu angalanerit
- Angojoqqaat efterskolertup napparsimaruloornerani imal. toqunerani angalaneri
Efterskolertoq nutaanik angajoqqaarsiartaarpat Efterskolertut Aqutsisoqarfianut uagutsinnullu nalunaarutigineqassaaq.
Angajoqqaarsiat
Tapisinissamut piumasaqaataavoq, efterskolertup pinngitsoornani angajoqqaarsiaqarnissaa.
Angajoqqaarsiat toqqartinnagit eqqarsaatigineqartariaqarpoq efterskolemiit angajoqqaarsianut aqqutaata takivallaannginnissaa. Ungasippallaarpata angajoqqaarsiat efterskolemi akuunissaat killeqalissammat, aammalu efterskolertup angajoqqaarsiaminut angalasarnera akisuvallaalissammat. Tassami angalaneq Naalakkersuisunit akiliunneqarneq ajormat - angajoqqaat namminneq akilertartussaavaat.
Angajoqqaarsianik nammineq nassaarsinnaanngikkaanni
Uagut angajoqqaarsassarsiornermi ikiuussinnaaneq ajorpugut, kisianni maani peqatigiiffiit inaataanni allagarsiivimmut allagarsiissutiliarsi nivinngarsinnaassavarput.
Angajoqqaajususi nammineerlusi Facebookikkut qinerlersinnaassaasi. Soorlu quppernerni "Kalaallit Danmarkimiittut", "Kalaallit Qallunaat Nunaanniittut" allallu kalaallit peqatigiiffii. Soorlu qinerliutigisinnaavasi oqaatsit "Grønlændere" aamma "Kalaallit".
Aamma efterskoli toqqarlugu ikiusinnaanersut aperisinnaavarsi, kisianni nalussanngilarsi angajoqqaarsiuussinermik ikiuinissamik pisussaatitaanngimmata.
Uani pingaarpoq angajoqqaat nammineq meeqqami nassiunnissaanut suleqataassammata, nammineq iluarisaminnik suleqatigisinnaasaminnillu angajoqqaarsassarsiorlutik. Angajoqqaarsiaanermi suliassarujussuuvoq, suleqatigiilluarnissarlu pingaaruteqarluinnarluni.
Angajoqqaarsiaanermut piumasaqaatit angajoqqaarsianngorniarnermut qinnuteqaatip quppernerata aappaani atuarsinnaassavarsi.
Aallannginnermi
Aallannginnermi pingaarpoq angajoqqaat efterskolertussap nassatassai isumagissagaat:
- Passeq NemID-lu
- Atuarfiup efterskolertumut nassataritikkusutai (ilaanni Danmarkimi pisiaralugit, Nunatsinnit nassiunneraninngaanniit, akikinnerusarpoq)
Efterskolertussap nassatassai tamarmik timmisartukkut nassarsinnaanngippata, sinneri umiarsuakkut efterskolimut imal. angajoqqaarsianut nassiunneqarsinnaapput. Uani angajoqqaat nassiussineq imal. oqimaappallaanik nassataqarnermi akiliutit namminneq akisussaaffigaat. Qanoq nassataqartigeqqusaaneq timmisartortitsiviup nittartagaani atuarneqarsinnaavoq. Soorlu Air Greenlandip nassatanut piumasaqaatai uani atuarneqarsinnaapput.
Aamma eqqaamassavarsi pingaarluinnarmat ukiorsiutit nassartinnissaat.
Blå sygesikringskort
Angajoqqaat efterskolemut angajoqqaarsianullu pisinnaatitsissummik atsiukkamik nassiussissapput. Taamaasilluni efterskoli angajoqqaarsialluunniit efterskolertumut blå sygsikringskortimik (nunanut allanut angalatilluni napparsimaleraanni ikiorneqarnissamut qularnaveeqqussummik) qinnuteqaassisinnaanngussapput.
Tikinneq
Nalinginnaasumik efterskolertussaq Danmarkimut tikikkuni angajoqqaarsiassaasa aassavaat, atuariartulerpallu atuarfimmukaallugu.
Ukioq manna, efterskolertunngortussat, angajoqqaarsiaminnukartinnatik, Foreningen Grønlandske Børnip aaqqissugaanik ES-campimut ilaasinnaassapput. Tassani makku sammineqassapput: Efterskolertaassami piumasaqaatit, kulturikkut assigiinngissutit, Danmarkimi efterskolerneq qanoq innersoq, Danmarkimi angalaneq aammalu nunatsinnit efterskolertussanik allanik naapisimaarnissaq. Ataatsimoorneq naammassippat sumiiffinni assigiinngitsuni Kalaallit Illuutaannukaanneqassapput. Tassanilu angajoqqaarsiaasut efterskolertussaq aassavaat.
Suli efterskolertuutissat allatsissimanngippat uunga allassinnaavutit: efterskole@nanoq.gl
Danmarkimi angalaneq
Efterskolertoq qimuttuitsuppat "Ungdomsbilletter" pisarineqarsinnaapput. Uani piumasaqaataaginnarpoq sygesikringskort (taanna sungaartoq) takutinneqarsinnaanissaa. Aamma Ung klapsædebilletter 89 kr-nillit toqqarneqarsinnaapput (ulapaarfiup avataani).
Ilinniagaqalernissamut siunnersuineq
Ilinniagaqalernissamut qinnuteqarfissaq marsip aallaqqaataa tikitsinnagu ilinniagaqalernissamut paasititsiniaasarpugut immersuititsillutalu. Immersukkallu angajoqqaanut nassiunneqartarput – taakku immersorneri naammasseriarlugit uppernarsaatit ilanngullugit Majoriamut ingerlateqqinniassammatigit.
Ilinniarnermut qinnuteqarusukkuit Sunngu alakkaruk.
Nunatsinnit misilitsinnerit
Misiliutitut kalaaliaqqat Danmarikimi efterskolertut toqqarsinnaanngorpaat nunatsinnit imaluunniit allatulli qallunaavaqqatut misilitsikkusunnerlutik - ilinniarfigerusutap piumasaqaatai apeqqutaatillugit.
Nunatsinnit misilitsikkusuttoqarpat, atuarfiup "Anmeldelse_Opgavebestilling" immersoriarlugu Nunatsinni Ilinniartitaanermut Aqutsisoqarfimmut januaarip 22-atinnagu emailerutigineqassaaq uunga: ila@nanoq.gl.
Ukua misilitsiffigineqarsinnaapput:
- Qallunaatoorneq
- Tuluttut
- Matematikki
Qinnuteqaatit uani aaneqarsinnaapput aammalu ilitsersuut uani.
Angerlarneq
Januaarip ingerlanerani angerlarniarnermut qinnuteqaat efterskolertup angajoqqaavinut nassiunneqartarpoq. Taakkulu atuarfik angajoqqaarsiallu qanimut suleqatigalugit immersoriarlugit uagutsinnut nassiuttarpaat.
Uagut qinnuteqaat Grønlands Rejsebureauimut ingerlateqqittarparput. Angalatitsiviullu, angalanissaq isumageriarlugu, qinnuteqaammi emailimut allassimasumut uagutsinnullu nassiuttarlugu.
Angerlarnissaq atuarfimmi naggataarnersiornerup kingornanissaaq. Taamaasilluni atuartoq naggataarnersiornermut ilaasinnaaniassammat, tassanimi imminnut inuulluaqqusarmata.
Angerlarnissamut qinnuteqaat aana qinnuteqaasiornermullu ilitsersuut aana.
Efterskolertussap nassatassai tamarmik timmisartukkut nassarsinnaanngippata, sinneri umiarsuakkut angerlamut nassiunneqarsinnaapput. Uani angajoqqaat nassiussineq imal. oqimaappallaanik nassataqarnermi akiliutit namminneq akisussaaffigaat. Qanoq nassataqartigeqqusaaneq timmisartortitsiviup nittartagaani atuarneqarsinnaavoq. Soorlu Air Greenlandip nassatanut piumasaqaatai uani atuarneqarsinnaapput.
Atugarliorneq
Atuartoq arlaatigut atugarliorpat piaartumik attavigineqassaagut. Taamaasilluini atuartoq/atuarfik/angajoqqaarsiallu qanimut suleqatigalugit ajornartorsuit aaqqinniarsinnaaniassavarput.
Unitsitsiinnarneq
Maanaannaq efterskolertoq angerlassappat, angerlarnissaa Efterskolertunik Aqutsisoqarfimmit akilerneqassappat, piumasaqaataavoq angerlarnissaq sioqqullugu atuartup oqaloqatigereersimassagaatigut.
Efterskolimut allamut nuunneq
Efterskolimut allamut nuunniarneq angajoqqaat namminneq isumagisassaraat. Angajoqqaalli eqqumaffigissavaat nuunnermi akitsuuteqarsinnaasarmat: Efterskolimi qimalikkami akitsuut, efterskolerfittaassami allatsinnermi akitsuut qularnerveeqqullu. Akitsuuteqassappat qularnaveqquuteqassappalluunniit angajoqqaat namminneq taakku akiligassarivaat.
Efterskolimut allamut nuunneq Efterskolertunut Aqutsisoqarfimmut uagutsinnullu nalunaarutigineqassaaq.
Isiginnaagassiaq
Efterskolerneq pillugu kalaallisut isiginnaagassiaq uani takusinnaavat.
