Menu

Angajoqqaanut

Efterskolertut angajoqqaavisa amerlasuut aatsaavissuaq meerartik allamiinnera misigisarpaat. Ilaasa meeqqap iperarnissaa unamminartissinnaasarpaat. Taamaammat ilissinnut siunnersuusiornikuuvugut.

Atuarfik qanimut suleqatigigisiuk

Atuarfik ilikkarluarusullugu atuarfiup nittartagaa qimerloorluarisiuk. Nalornissuteqaraangassi aperisarlugit.

Meeraq aallartinnagu, atuarfik meeraq pillugu paasissutissikkisiuk. Soorlu nalinginnaasumik ernumassutiniit meeqqap ajoqutaanik, nappaataanik imaluunniit tarnikkut unamminartittagaanik.

Akuliunnak tusarnaartarit

Meeraq angerlarserpat, uumigisaqarluni ajornartorsiuteqarluniluunniit tutsiuppat, akuliunnani tusarnaarnissaq pingaarpoq. Taamaattoqarpat pitsaanerussaaq atuarfimmi attaveqaataa susoqarneranik paasitikkukku. Taamaasilluni taanna suliniuteqarsinnaassaaq.

Meeraq ilumut atugarliorpat, sukkanerpaamik attaveqarfigissavatsigut. Taamaasilluta susoqarnera misissussavarput aaqqiiniaallutalu.

Atuarfimmi attaveqaataasoq tatigissavat

Meeraq efterskolemi nammineq ilinniartitsisumik attaveqaateqalertarpoq. Uani pingaarpoq attaveqaataata tatiginera meeqqamut takutitsinissaa. Taassumami atuartunik nutaanik sullissinissaq ilikkaasimalluinnarmagu.

Meeqqap, angerlamut sianernani, attaveqaatiminut saaffiginnittarnissaata ilikkarnissaa pingaarpoq. 

Tusagaqanngikkaanni ajortoqarsimanavianngilaq

Efterskolerlutik aallarterlaat nikuppassuit atorlugit efterskolemi inuuneq ilikkaanniarsarisarpaat. Taamaammat angerlamut tutsaqarnissaq nukissaqarfigineqarpallaarneq ajorpoq.

Taamaammat pitsaanerussaaq meerarlu isumaqatigiissusiussasusi, aatsaat nukissaqaraangami angerlamut tutsiuttassasoq.

Maanngaanniit siunnersuutigissavarput, akulikippallaamik attaveqarfigisassanngikkissi - siunnersuutigisarparput annerpaamik sap. ak. ataasiarlusi ullumi aalajangersimasumi attaveqaqatigiittassasusi. Facebookimiippat imaluunniit tamakku assigisaanik atuisuuppat, taakkunatigut akuiliunnasi malinnaaffigissagissi. Eqqissilluni efterskolernini ilikkaanniassammagu.

Eqqaamasassavarsi piffissap akunnernik 4-nik nikinganera. Tassa nunatsinni nalunaaqutaq unnukkut arfineq-pingasunngorpat Danmarkimi unnuap qeqqartarmat.

Maqaasineq

Meeraq maqaasigukku, kammalaatitit ilaquttatilluunniit maqaasinerit pillugu oqaluuttassavatit - meeraanngitsoq. Maqaasinersi tusarlugu angerlarsilersinnaagami ileratsalluniluunniit.

Meeraq ilaqutariit pilersaarutaanniitsissanngilarsi

Paasisariaqarparsi, meerarsi massakkut ilaquttat pingaartissinnaanngimmagit. Meeqqap, efterskoli ikorfartorfigalugu, nammineersinnaanissani ilinnialermagu. Taamaasillunilu inuunermini misigisassai nuannernerpaat ilaat toqqissisimanartumik misigissallugit. Taamaannissaa akuerisariaqarparsi.

Juullimi atuanngiffeqarneq

Maanngaanniit atuartitsineq atuarfimmilu sutitsineq suli ingerlaartillugu nunatsinnukarneq kajumissaarutiginngilarput. Juullillu nalaani angerlassappat atuanngiffeqarfimmi kisimi peqanngissassoq - takinerussanngitsoq. Taamaasilluni atuaqatigiillutik atuarfimmi nuannisaaqatigiinnerat akuuffiginngitsuussanngilaat aammalu atuaqatigillutik ataatsimooqatigiinnerat kammagiinnerallu itisinerulissaaq.

Meeqqap aningaasaqarnera

Ilissi, angajoqqaat, meeqqap efterskolernermini aningaasaqarnera akisussaaffigaarsi:

  • Kaasarfimmiussai (ulluginnarni aningaasartuutit)
  • Danmarkip iluani angalanerit (amerlarsooria angajoqqaarsianut)
  • Paasiniaalluni angalanerit (studierejser)
  • Atuarfimmut atatillugu akiligassaasinnaasut allat
  • Allat ilimaginngisamik akitsuutaasinnaasut

Eqqaamassavarsi, efterskolertussap ukiorsiutini (atisat kamippaallu) nassassammagit. Ilanngullugu efterskolip piumasaqaatigisinnaavaa meeqqap sikkileqarnissaa, angallattakkamik qarasaasiaqarnissaa, oqarasuaateqarnissaa, sinngup puujuteqarnissaa, qipiuteqarnissaa il.il. Tamakku ilai akissaqartinngikkussigit Majoriamut, ilissinnut qaninnermut, tapertinnissamut qinnuteqarsinnaavusi.

Sillimmaserneq

Eqqaamassavarsi, meerarsi 18-iniliineqartinnagu, suli ilissi sillimatissinnut ilaassammat.

Facebookimi Danmarkimi efterskolertunut, angajoqqaavinut, ilaqutariit attaveqaataannut efterskolinullu qupperneq

Quppernermukarit

Paasisaqarnerorusukkuit

  • Mette Lund

    Ilinniarnermut aqqutissiuisoq

    +45 25 60 76 46

  • Kistaraq Egede

    Ilinniarnermut aqqutissiuisoq

    +45 22 42 08 13